கடந்து போன காலத்தின் தித்திப்புகளை நினைவில் மீட்டுக் கொண்டு வந்து திரும்ப ருசிப்பது அனைவருக்கும் பிடித்த செயல். இந்த இதழின் சிறப்புப் பகுதியான ‘அது ஒரு காலம்’, வாசிப்பின் ருசி அறிந்தவர்களுக்கு அத்தகையதொரு விருந்து. இருபதாம் நூற்றாண்டின் தொடக்க காலப் பத்திரிகை எழுத்தில் இருந்து சில சுவாரசியமான பக்கங்களை இந்த இதழில் பால கணேஷ் தந்திருக்கிறார். அந்நாளைய உரைநடை, அந்தக் காலத்து சினிமா செய்திகள், அப்போதைய நகைச்சுவை, அன்றைய ஓவியங்கள் என்று ஒவ்வொரு பிரிவிலும் பார்த்துப் பார்த்துத் தேர்ந்தெடுத்திருக்கிறார். வரலாற்றைத் திரும்பிப் பார்க்கும் சுவாரசியம் ஒரு புறம் இருக்க, நாம் எங்கிருந்து எங்கு நகர்ந்து வந்திருக்கிறோம் என்று ஒப்பிட்டுப் பார்க்க இது ஒரு வாய்ப்பு.

இந்த ஆண்டுக்கான நோபல் பரிசுகள் வழங்கப்பட்டிருக்கின்றன. இந்த இதழில் நான்கு கட்டுரைகள் இது சார்ந்து வெளியாகியிருக்கின்றன. நோபல் பரிசு எவ்வாறு வழங்கப்படுகிறது என்று விளக்கி ஜெயரூபலிங்கம் எழுதியிருக்கிறார். மருத்துவ நோபல் பரிசு பெற்றிருக்கும் ஸ்வீடனைச் சேர்ந்த ஸ்வாண்டே பாபோ எதனால் இவ்விருதுக்குத் தகுதி பெறுகிறார் என்று மிக அற்புதமாக விளக்கியிருக்கிறார் ராஜிக் இப்ராஹிம். அறிவியலைக்கூட இப்படியெல்லாம் இனிக்க இனிக்கச் சொல்ல முடியும் என்பது வியப்புத்தான். இலக்கியத்துக்கான விருது பெற்றிருக்கும் பிரெஞ்சு எழுத்தாளர் ஆனி எர்னோ குறித்து தர்ஷனா கார்த்திகேயன் விரிவான அறிமுகத்தைத் தந்திருக்கிறார். தமிழில் அவரைக் குறித்து வெளியாகும் முதல் கட்டுரை இதுதான். அப்புறம் சிவசங்கரியின் ‘நோ-பால்’. இது சிரிப்பதற்கு மட்டும்.

வட கொரியாவின் அணு ஆயுத முஸ்தீபுகள், ஏவுகணைப் பரிசோதனைகள் குறித்து அடிக்கடிக் கேள்விப்படுகிறோம். அமெரிக்கா எப்படி இன்னும் இந்த ஒரு தேசத்தை மட்டும் ஒன்றும் செய்யாமல் விட்டு வைத்திருக்கிறது என்கிற வினா, அமெரிக்காவை நன்கறிந்த அத்தனைப் பேருக்கும் எழும். அதற்கு விடை தரும் விதமாக இந்த இதழில் (வட கொரியா, இது சரியா?) மிக விரிவானதொரு கட்டுரை எழுதியிருக்கிறார் பத்மா அர்விந்த். சர்வதேச அரசியலில் ஆர்வமுள்ள யாரும் தவறவிடக்கூடாத கட்டுரை இது.

அவ்வண்ணமே, ரணில் இலங்கை அதிபராகி நூறு நாள்கள் நெருங்குகின்றன. பொருளாதாரச் சீரழிவின் உச்சத்தைத் தொட்டு மூச்சுத் திணறிக்கொண்டிருக்கும் தேசத்தை இடரிலிருந்து மீட்க இந்நாள்களில் அவர் என்ன செய்தார்? அக்கு வேறு ஆணி வேறாக அலசி ஆராய்கிறது ஸஃபார் அஹ்மதின் கட்டுரை.

ஸோஹோ நிறுவனர் ஶ்ரீதர் வேம்பு குறித்த பாபுராஜின் கட்டுரை, துபாயில் புதிதாகக் கட்டப்பட்டிருக்கும் இந்து கோயில் குறித்த நசீமாவின் கட்டுரை, தமிழ் பத்திரிகைகளின் ஆதிகால வரலாற்றை சுவாரசியமாக விவரிக்கும் அறிவனின் கட்டுரை என்று இந்த இதழில் வாசிக்கவும் நேசிக்கவும் ஏராளமாக உள்ளன.

மெட்ராஸ் பேப்பர் உங்களுக்குப் பிடித்திருந்தால் உங்கள் நண்பர்களுக்குப் பரிந்துரை செய்யுங்கள். அவர்களையும் சந்தாதாரராக்குங்கள். நாம் இணைந்து இதனை ஒரு தரமான வாசிப்பு இயக்கமாக முன்னெடுப்போம்.