அரசியல்வாதிகள், கலைஞர்கள், எழுத்தாளர்கள், மதவாதிகள், மடாதிபதிகள், பாதிரியார்கள், கல்வியாளர்கள் என்று எல்லா தரப்பினர் மீதும் பாலியல் குற்றச்சாட்டுகள் சமீப காலமாகப் பெருகி வருகின்றன. இப்பட்டியலில் சமீபத்தில் இணைந்திருப்பது கலாக்ஷேத்ரா. அங்கு பணிபுரியும் சில ஆசிரியர்கள் மீது வைக்கப்பட்டிருக்கும் பாலியல் குற்றச்சாட்டுகள் தேசம் முழுதும் அதிர்வலைகளை எழுப்பியிருக்கின்றன. ஏனெனில், பல்லாண்டுக் காலமாக அவ்வமைப்பின் மீது போர்த்தப்பட்டிருந்த புனிதப் போர்வையின் கனம் அத்தகையது. பொறியியல் படிப்புக்கு ஐஐடி எப்படியோ, நாட்டியல் கல்விக்கு கலாக்ஷேத்ரா அப்படி. உலகெங்கிலும் இருந்து மாணவர்கள் அங்கே வந்து பயில்வது காலம் காலமாக உள்ள வழக்கம்.

ஐஐடி வளாகத்துக்குள் நிகழும் குற்றங்கள் இப்போது மெல்ல மெல்ல வெளிவரத் தொடங்கியிருக்கும் சூழலில் கலாக்ஷேத்ராவும் தனது புனிதப் புண்ணாக்கு மூட்டைகளை இறக்கி வைக்க வேண்டிய நெருக்கடிக்கு உள்ளாகியிருக்கிறது. நிறுவனம் என்பதென்ன? சில தனி நபர்களால் ஆனதுதானே? குற்றவாளிகள் எங்கும் இருப்பார்கள். எத்துறையிலும் இருப்பார்கள்.

இந்த இதழில் இடம் பெற்றுள்ள கோகிலாவின் ‘கலாக்ஷேத்ரா: என்ன நடக்கிறது?’ என்கிற கட்டுரை எச்சார்பும் இன்றி உண்மைகளை அப்பட்டமாகக் காட்சிப்படுத்துகிறது. மீ-டூ என்பது வெறும் குற்றச்சாட்டுகளின் தொகுப்பாகத் தேங்கிவிடாமல் அவற்றின் மீதான நடவடிக்கைகளை முடுக்கிவிட வேண்டிய அவசரமும் அவசியமும் அரசுக்கு இருக்கிறது. ஒரு கொலை அல்லது கொள்ளைச் சம்பவத்தை சாட்சிகளின் மூலமாகவும் ஆதாரங்களின் மூலமாகவும் நிரூபிக்க முடியும். பாலியல் அத்துமீறல்கள், சீண்டல்கள், சுரண்டல்கள் அத்தகையவை அல்ல. சாட்சியோ ஆதாரங்களோ இல்லாத காரணத்தினாலேயே இக்குற்றங்களில் ஈடுபடுவோர் தண்டனையில் இருந்து தப்பிப்பது நடைமுறை ஆகிவிடக் கூடாது. அப்படித்தான் அது ஆகும் என்றால், குற்றங்கள் மேலும் பெருகவே செய்யும்.

மீ-டூ குற்றச்சாட்டுகளை விசாரிக்கவும் தண்டனைப் பரிந்துரைகள் தரவும் தனியொரு அமைப்பையே உருவாக்குவது காலத்தின் கட்டாயமாகியிருக்கிறது. அரசு ஆவன செய்ய வேண்டும்.

சர்வதேச அளவில் கடந்த வாரம் மிகப்பெரிய அதிர்ச்சியை உருவாக்கிய பலஸ்தீன் அல் அக்ஸா தாக்குதல் சம்பவம் குறித்து ரும்மான் ஒரு கட்டுரை எழுதியிருக்கிறார். ஆண்டுதோறும் ரமளான் சமயத்தில் அப்பள்ளி வாசல் வளாகத்தில் இஸ்ரேலியப் படைகள் ஏதாவது ஒரு காரணம் சொல்லித் தாக்குதல் நடத்துவதன் ஒரே நோக்கம், இஸ்லாமியர்களைச் சீண்டி, போருக்கு இழுப்பது மட்டும்தான். அல் அக்ஸாவில் ஒரு சிறிய தாக்குதலை மேற்கொண்டால் அங்கே காஸாவில் ஹமாஸ் பதில் தாக்குதலை ஆரம்பிக்கும். அதைச் சுட்டிக்காட்டி பலஸ்தீன் முஸ்லிம்களின் மீது முழுநீளத் தாக்குதல் நடவடிக்கைகளை ஆரம்பித்துவிடுவார்கள். இது ஆண்டுதோறும் அங்கே நடப்பது.

இவ்விவகாரத்தின் ஆழம் தொட்டுப் பேசுகிற இக்கட்டுரை, அல் அக்ஸாவின் வரலாற்று முக்கியத்துவத்தையும் விரிவாக விளக்குகிறது.

ஸ்காட்லந்தின் புதிய முதலமைச்சராகியிருக்கும் பாகிஸ்தானி வம்சாவழியைச் சேர்ந்த ஹம்சா யூசஃப் குறித்து ஜெயரூபலிங்கம் எழுதியிருக்கும் கட்டுரை, ரஷ்யா-சீனா-சவூதி அரேபியா மூன்று நாடுகளும் கூட்டணி வைத்து அமெரிக்க டாலரைப் பின்னுக்குத் தள்ள மேற்கொண்டிருக்கும் நடவடிக்கைகளை விவரிக்கும் ஸஃபார் அஹ்மதின் கட்டுரை, நேட்டோவில் பின்லாந்து இணைந்திருப்பதன் அரசியல் முக்கியத்துவத்தைச் சுட்டும் வினுலாவின் கட்டுரை, என்.சி.ஈ.ஆர்.டி பாடப் புத்தகங்களில் மேற்கொள்ளப்பட்டிருக்கும் சில அபாயகரமான திருத்தங்களைச் சுட்டிக்காட்டும் பாண்டியராஜனின் கட்டுரை என்று இந்த இதழில் கனம் கூடிய படைப்புகள் அதிகம்.

படித்துவிட்டு உங்கள் கருத்துகளை எழுதுங்கள்.