Home » Home-06-07-22

வணக்கம்

இந்த இதழில் இன்னும் இரண்டு புதிய கரங்களை உங்களுக்கு அறிமுகம் செய்கிறோம். ந. ஜெயரூபலிங்கம், ஶ்ரீதேவி கண்ணன். முன்னவரின் சிறுகதையும் அடுத்தவரின் கட்டுரையும் உங்கள் ரசனைக்கும் சிந்தனைக்கும் விருந்தாக அமையும் என்பதில் சந்தேகமில்லை. தமிழில் சிறப்பாகவும் கூர்மை குன்றாமலும் எழுத எங்கெங்கிருந்தோ, எவ்வளவோ பேர் வந்துகொண்டேதான் இருக்கிறார்கள். அவர்களைக் கவனப்படுத்தும் பணியை மெட்ராஸ் பேப்பர் தவறாமல் செய்யும்.

சிறப்புப் பகுதி, இம்முறை ஆன்லைன் ஷாப்பிங். இது இல்லாத தமிழர் வாழ்வே இல்லை என்னும் சூழல் உருவாகிவிட்டது. குறிப்பாக நகர்ப்புற-சிறு நகர்ப்புற மக்களின் அன்றாடங்கள் பெரும்பாலும் ஆன்லைனை நம்பி இருக்கும் சூழல் ஏற்பட்டிருக்கிறது. கணவன்-மனைவி இருவரும் வேலைக்குச் செல்லும் வீடுகளில் காய்கறி, இறைச்சி, மளிகைப் பொருள்கள் முதல், தேவையான அனைத்துமே ஆன்லைன் வழி வாங்கும் வழக்கம் பெருகி இருக்கிறது. கடைக்குப் போகவும் நேரமில்லாத வாழ்க்கைச் சூழல். இதனைப் புரிந்துகொண்டு, காய்கறிகளை நறுக்கிப் பொட்டலம் கட்டி விற்கும் கடைகளும் பெருகி இருப்பதைக் காண்கிறோம். நறுக்கிய கேரட், துருவிய தேங்காய், அப்படியே எடுத்து அடுப்பில் போட்டு வாட்டிச் சாப்பிடத் தயாரான பதத்தில் சப்பாத்தி, பரோட்டா வகையறாக்கள், ரெடிமேட் வத்தக் குழம்பு என்று பல வீட்டு வாசல்களில் அதிகாலை நேரம் பார்சல்களில் வந்து அமர்ந்திருப்பவை நமக்கு மௌனமாகத் தெரிவிக்கும் உண்மைகள் அநேகம்.

பணிச் சூழல் நம்மை வாழ முடியாமல் ஆக்கிக்கொண்டிருக்கிறதா? அல்லது நாம் வாழத் தெரியாதவர்கள் ஆகிக்கொண்டிருக்கிறோமா? இந்த இதழில், ஆன்லைன் ஷாப்பிங்கின் சாதக பாதகங்களை விளக்கும் கட்டுரைகளோடு, இந்தத் துறை எப்படி இயங்குகிறது என்று உள்ளே இறங்கி ஆராயும் கட்டுரை ஒன்றும் (எப்படி நடக்கிறது இணைய வர்த்தகம்?) இடம் பெற்றுள்ளது.

துபாயில் திறக்கப்பட்டிருக்கும் முகம்மது பின் ராஷித் நூலகம் மற்றும் சென்னையின் அடையாளங்களுள் ஒன்றான தேவநேயப் பாவாணர் நூலகம் - இரண்டினைக் குறித்தும் இந்த இதழில் அடுத்தடுத்து எழுதப்பட்டிருப்பதைக் காணலாம். இது பரபரப்புக்காகவோ, அவல ஒப்பீட்டுக்காகவோ செய்யப்பட்டதல்ல. நூலக இயக்கம் என்பது ஒவ்வொரு தலைமுறையிலும் புதிய புதிய வாசகர்களைச் சத்தமின்றி உருவாக்கிக்கொண்டே இருக்க வேண்டிய ஒன்று. ஆனால் இருக்கும் சொற்ப வாசகர்களையும் தூரத் தள்ளி வைக்கும் விதமாக அது இயங்குமானால் (அல்லது இயங்காதிருக்குமானால்) என்ன பயன்? தமிழ்நாடு அரசின் பொது நூலகத் துறை விழித்துக்கொள்ள வேண்டிய நேரம் இது.

இலங்கையின் பொருளாதாரச் சீரழிவு நிலை அதன் உச்சத்தை நோக்கிச் சென்றிருக்கிறது. மொத்த தேசமும் அடுத்து என்ன செய்வதென்று தெரியாமல் திகைத்துத் தடுமாறி நிற்கும் சூழலில், இம்மாபெரும் பிரச்னையை ஈழத் தமிழர்கள் எவ்வாறு காண்கிறார்கள்; பொருட்படுத்துகிறார்கள் என்பதை ஆராயும் ஸஃபார் அஹ்மதின் கட்டுரையும்; இலங்கையின் கல்வித் துறை வரலாறு காணாத தேக்கத்தைச் சந்தித்திருக்கும் சூழலை விவரிக்கும் நர்மியின் கட்டுரையும்; ஹாங்காங் சீனாவின் வசம் சென்று இருபத்தைந்தாண்டுகள் பூர்த்தியாவதை முன்னிட்டு அம்மண்ணின் இன்றைய வளர்ச்சி நிலையை ஆராயும் பூவராகனின் கட்டுரையும் கூர்ந்து வாசிக்கப்பட வேண்டியவை.

மெட்ராஸ் பேப்பர் தொடங்கி, இது ஆறாவது இதழ். தொடர்ந்து இதனை ஆதரித்து வரும் வாசகர்களுக்கு நன்றி. சிக்கல் மிகுந்த சர்வதேச விவகாரங்களை எளிய தமிழில் தொடர்ந்து உங்களுக்கு வழங்கும் பணியை இதழ்தோறும் மேம்படுத்திக்கொண்டே இருப்போம். இது நாங்கள் தரும் வாக்குறுதி. இதழ் உங்களுக்குப் பிடிக்குமானால் உங்கள் நண்பர்களுக்கு மெட்ராஸ் பேப்பரைப் பரிந்துரை செய்யுங்கள். அவர்களையும் சந்தாதாரர் ஆக்குங்கள்.

இது நாம் இணைந்து இழுக்க வேண்டிய தேர்.

சிறப்புப் பகுதி: ஆன்லைன் ஷாப்பிங்

ஊரும் உலகமும்

உண்மையும் புனைவும்

  • வரலாறு முக்கியம்: தமிழர் வர்த்தகம்

  • தொடரும்

    இலக்கியம் நாவல்

    ஆபீஸ் – 68

    68 ஈட்டி இல்லாததற்காக ஏங்குவதோ இழந்ததை எண்ணி அழுவதோ அவன் இயல்பிலேயே இல்லை என்றாலும் கையில் காசில்லாமல் போகும்போதெல்லாம் டிவி வாங்கித் தருகிறேன் என்று ஆயிரம் ரூபாயை அபேஸ் பண்ணிவிட்டு ஓடிய ரங்கன் துரைராஜ் நினைவு வருவதை மட்டும் அவனால் தவிர்க்க முடியவில்லை. அப்போதும் வருத்தத்தைவிட கோபம்தான் பொங்கி...

    Read More
    வெள்ளித்திரை

    காணாமல் போன கனவுத் தொழிற்சாலை!

    சினிமாத்துறையை வைத்து எழுதிய நாவலுக்குக் ‘கனவுத் தொழிற்சாலை’ என்று பெயரிட்டார் சுஜாதா. அந்தத் தலைப்பை அவர் தருவதற்குக் கிட்டத்தட்ட அறுபதாண்டுகளுக்கு முன்பே திரைப்படத் தயாரிப்பை ஒரு தொழிற்சாலை நடத்துவதைப் போல கட்டுக்கோப்பாகவும், நேர்த்தியாகவும், ஒழுக்கமாகவும், முக்கியமாக- லாபகரமாகவும் நடத்திக்...

    Read More
    உயிருக்கு நேர் தொடரும்

    உயிருக்கு நேர் – 43

    43 ஔவை துரைசாமிப்பிள்ளை (05.09.1902 – 03.04.1981) ஆயிரத்துத் தொள்ளாயிரத்து நாற்பதுகளில் மணிமேகலைக் காப்பியத்துக்குப் புதிய முறையிலான உரை ஒன்றை நாவலர் வேங்கடசாமி நாட்டார் அவர்கள் எழுதிக் கொண்டிருந்தார். கரந்தைத் தமிழ்ச்சங்கத்தின் ஏற்பாட்டில் இந்த முயற்சி நடைபெற்றது. எழுதிக் கொண்டிருந்த நாட்டார்...

    Read More
    குடும்பக் கதை தொடரும்

    ஒரு  குடும்பக்  கதை – 69

    69. மீண்டும் காங்கிரஸ் தலைமை கவலையுடன் நேருவும், இந்திராவும் லண்டனிலிருந்து திரும்பியபோது, கமலா நேருவின் உடல்நிலையில்  சற்று முன்னேற்றம் காணப்பட்டது. இந்திரா தன்னுடைய பள்ளிக்குப் புறப்பட்டார். அம்மாவின் உடல்நிலை, கடினமான இலக்கணத்துடன் கூடிய ஜெர்மன் மொழிப் படிப்பு, கடுப்படிக்கும் ஜெர்மன்...

    Read More
    error: Content is protected !!