வழக்கத்தினும் இந்த ஆண்டுக் கோடை ஒரு நவீன கவிதையாகவே காட்சி தருகிறது. வெளியே பத்து நிமிடங்கள் போய்விட்டு வீட்டுக்கு வந்தால் சிறிதுநேரம் ஒன்றுமே புரிவதில்லை. ஆணவமல்லாத ஏதோ ஒன்று கண்ணை மறைக்கிறது. ஐந்து நிமிடங்கள் அமைதியாகப் படுத்து எழுந்தால் சரியாகிவிடும் என்று பார்த்தால், படுக்கத்தான் முடிகிறதே தவிர, எழுந்திருக்க முடிவதில்லை. ஆனால் வெளியே போய்த்தான் தீர வேண்டியிருக்கிறது. வேலை பார்த்துத்தான் ஆகவேண்டியிருக்கிறது. நமது அன்றாடங்களை எப்படி நம்மால் தவிர்க்க முடியாதோ அப்படித்தான் இயற்கைக்கும்.

இந்தக் கோடையை நேர்த்தியாகச் சமாளித்து வாழ இந்த இதழில் உபயோகமான நூறு டிப்ஸ் தருகிறார் காயத்ரி. ஒய். படித்துப் பயன்படுத்துவதுடன் எடுத்து பத்திரப்படுத்தி வையுங்கள். மீண்டும் அடுத்த கோடைக்கு உதவும்.

கர்நாடகத்தில் சித்தராமய்யாவும் துருக்கியில் எர்டோகனும் கணிப்புகளைப் பொய்யாக்கித் தமது மக்கள் ஆதரவை உறுதி செய்திருப்பதே வாரத்தின் சிறப்புச் செய்திகள். இதில், எர்டோகன் தேர்தலில் வென்ற சூழல் முக்கியமானது. துருக்கித் தேர்தலே என்றாலும் உண்மையில் இது அமெரிக்க-ரஷ்ய பலப்பரீட்சையின் இன்னொரு மறைமுக வடிவம். இந்த இதழ் தலையங்கத்தில் குறிப்பிடப்பட்டிருப்பது போல, எண்பதுகளின் பனிப்போர் இப்போது வேறொரு முகம் கொண்டு மீண்டும் அரங்கேறத் தொடங்கியிருப்பது கண்கூடு. துருக்கி தேர்தல் முடிவுகளை முன்வைத்து (என்னதான் மே 28 அன்று இறுதிப் பரீட்சை இருந்தாலும்) ஸஃபார் அஹ்மத் எழுதியிருக்கும் கட்டுரை, உலகம் எதிர்கொள்ளவிருக்கும் அடுத்தக்கட்ட அரசியல் நெருக்கடிகளின் களம் என்னவாக இருக்கப் போகிறது என்பதை மறைமுகமாகச் சுட்டிக்காட்டுகிறது.

வினுலா எழுதியுள்ள ‘அடையாளங்களை அழித்தொழிப்போம்’ இன்னொரு மிக முக்கியமான கட்டுரை. தொடக்க காலம் முதலே உக்ரைனின் கலாசார-பண்பாட்டு வேர்களை நாசம் செய்யும் முயற்சியில் ரஷ்யா இதுவரை என்னவெல்லாம் செய்திருக்கிறது என்பதை இக்கட்டுரை துல்லியமாகப் படம்பிடிக்கிறது. ஓர் இனத்தை வேரறுப்பது என்பதன் முதல்படி, அதன் பண்பாட்டு அடையாளங்களை அப்புறப்படுத்துவதேயாகும். காலம் காலமாக ரஷ்யா இதனை ஒரு செயல்திட்டமாகவே முன்வைத்து இயங்கி வருவதைத் தோலுரிக்கும் இக்கட்டுரையை நீங்கள் உலகின் பல ஏகாதிபத்திய-கோலோச்சு சக்திகளுடன் ஒப்பிட்டுப் பார்க்கலாம். மிக நிச்சயமாக, இக்காலக்கட்டத்தின் மாபெரும் அச்சுறுத்தல் அமெரிக்காவோ வட கொரியாவோ அல்ல; ரஷ்யாதான் என்பது புலப்படும்.

வட கொரியா என்றதும் அதன் சமீபத்திய உளவு சாட்டிலைட் முயற்சியைக் குறித்துப் பேசாதிருக்க முடியாது. தென் கொரியாவைக் கண்காணிக்க என்று வட கொரிய அதிபர் போகிற போக்கில் சொல்லிவிட்டுப் போய்விடுவார். உண்மை அதுவல்ல. தெற்காசியப் பிராந்தியத்தின் நிரந்தரத் தலைவலியாக உருவெடுப்பதை ஒரு செயல்திட்டமாக வைத்துக்கொண்டு இயங்கிவரும் வட கொரியாவின் இந்த உளவு சாட்டிலைட் அமெரிக்காவின் கோபத்தை வலுவாகக் கிளறிவிட்டிருப்பது திண்ணம். இது குறித்த விரிவான கட்டுரை ஒன்றைச் சிவராமன் கணேசன் எழுதியிருக்கிறார்.

ட்விட்டரின் புதிய தலைமைச் செயல் அதிகாரியாகியிருக்கும் பெண்மணி குறித்து, அரிசியே பயன்படுத்தாத அண்ணாநகர் உணவகம் குறித்து, நாய் வளர்ப்போர் அதிகரித்திருக்கும் சூழலில் ஒரு நாயை வளர்க்க ஆகும் மொத்த செலவு என்ன என்பது குறித்து, காலாவதியாகப் போகிற இரண்டாயிரம் ரூபாய் நோட்டின் துர்மரணம் குறித்து, அனைத்து வெப் பிரவுசர்களிலும் உள்ள இன்காக்னிடோ வசதி ஏன் என்பது குறித்து - எது மிச்சம்?

எல்லா விதமான ருசிகளுக்கும் இடம் தரும் கட்டுரைகளுடன் இந்த இதழ் வெளியாகியிருக்கிறது. படித்துவிட்டு உங்கள் கருத்துகளை எங்களுக்கு எழுதுங்கள். இதழ் பிடித்திருந்தால் உங்கள் நண்பர்களுக்குப் பரிந்துரை செய்து அவர்களையும் சந்தாதாரர் ஆக்குங்கள்.

மீண்டும் அடுத்த வாரம் சந்திப்போம்.