உக்ரைன் மீதான ரஷ்யப் படையெடுப்பு, உலகம் எதிர்பார்த்ததினும் மோசமான எல்லையை நோக்கி நகர்ந்துகொண்டிருப்பது போலத் தெரிகிறது. உக்ரைனியக் குழந்தைகளை (போர்க்களமாக அறிவிக்கப்பட்டுள்ள எல்லைப் பகுதிகள் சிலவற்றில் வசிப்பவர்கள்) வலுக்கட்டாயமாக ரஷ்ய வீரர்கள் நாடு கடத்தி, தம் தேச எல்லைக்குள் இழுத்துச் சென்று இருக்கிறார்கள். அப்படிக் கட்டாய நாடு கடத்தலுக்கு உட்பட்ட சிறுவர்களின் எண்ணிக்கை பதினாறாயிரத்தைத் தாண்டும் என்று சொல்கிறார்கள்.

இது சந்தேகத்துக்கு இடமின்றி ஒரு போர்க்குற்றம். இதற்காக ரஷ்ய அதிபர் விளாடிமிர் புதினுக்கு எதிரான கைது உத்தரவு ஒன்று பிறப்பிக்கப்பட்டுள்ளது. உத்தரவிட்டிருப்பது சர்வதேசக் குற்றவியல் நீதிமன்றம்.

யாரும் உடனே புதினைக் கைது செய்யப் போவதில்லை; அதற்கெல்லாம் வாய்ப்பும் இல்லை என்பது அனைவருக்கும் தெரியும். இருந்தாலும் யுத்தம் தொடங்கிய நாள் முதல் இது ஓர் அநியாயப் போர்; அத்துமீறல் என்று கருதும் பெரும்பான்மை மனித குலத்துக்கு ஒரு சிறிய ஆறுதலான அறிவிப்பு என்பதில் ஐயமில்லை.

இது ஒரு புறம் இருக்க, பிராந்தியத்தில் பறந்த ஆளில்லா அமெரிக்க ட்ரோன் விமானமொன்றை ரஷ்யா சுட்டு வீழ்த்தியிருக்கிறது. இது அபாயம். ஏனெனில், நேற்று வரை அமெரிக்கா உக்ரைனுக்கு உதவி வந்ததே தவிர நேரடியாக ரஷ்யா மீது எந்தத் தாக்குதலும் தொடுக்கவில்லை. ரஷ்யாவும் உக்ரைனிய இலக்குகளை மட்டுமே தாக்கி வந்ததே தவிர, அதன் உதவி நாடுகளைத் தொட்டதில்லை. ஆனால் மார்ச் 14ம் தேதி நடந்த இச்சம்பவம், அமெரிக்காவின் மீது ரஷ்யா நேரடியாகத் தாக்குதல் நடத்த ஆயத்தமாகிவிட்டது போன்ற ஒரு தோற்ற மயக்கத்தை உருவாக்கவே, ஐரோப்பியக் கண்டம் முழுதும் பதற்றம் எழுந்துள்ளது. இது ஒன்றுமில்லாமல் அடங்கிவிடுமானால் ஊருலகுக்கு நல்லது. சிக்கல் பெரிதானால் விளைவுகள் சிந்திக்கக்கூடியதல்ல. இப்பிரச்னையின் ஆழ அகலங்களை விரிவாக விவரிக்கும் கட்டுரை ஒன்றை இந்த இதழில் வினுலா எழுதியிருக்கிறார்.

இதனைப் போலவே இன்னொரு முக்கியமான கட்டுரை, அமெரிக்காவின் சிலிக்கன் வேலி வங்கி இழுத்து மூடப்பட்டதன் பின்னணி குறித்துப் பேசுகிறது. இலவசக் கொத்தனார் எழுதியிருக்கும் இக்கட்டுரை, நாற்பதாண்டுகால வரலாறுள்ள ஒரு வங்கி எப்படி நான்கே நாள்களில் மூழ்கிப் போகும் என்று தெள்ளத்தெளிவாக விளக்குகிறது.

மத்திய அமெரிக்க நாடான ஹண்டுரஸில் இருந்து அமெரிக்காவுக்கு சட்ட விரோதமாக நுழைந்து, அவதிப்படும் லட்சக்கணக்கான சிறுவர்கள் எதிர்கொள்ளும் பிரச்னைகளை விவரிக்கும் ஆ. பாலமுருகனின் ‘எல்லை தாண்டும் பிள்ளைகள்’, இலங்கைப் பிரச்னையின் இன்றைய பரிமாணத்தை விவரிக்கும் ஸஃபார் அஹ்மதின் ‘மாற்றிப் போட்ட ட்யூனும் மாறாத அவலங்களும்’, அ. பாண்டியராஜனின் ‘தள்ளாடும் கல்வித்துறை; தடுமாறும் மாணவர்கள்’, சிவராமன் கணேசனின் ‘உளவுக்கு வந்த புறா’ என்று இந்த இதழெங்கும் நீங்கள் வாசிப்பதற்கு சுவாரசியமான படைப்புகள் பல உள்ளன.

மெட்ராஸ் பேப்பர் குறித்த உங்கள் கருத்துகளை எங்களுக்கு எழுதுங்கள். அது இதழை இன்னமும் மேம்படுத்த உதவும். பிடித்திருந்தால் உங்கள் நண்பர்களுக்குப் பரிந்துரை செய்யுங்கள். அவர்களையும் சந்தாதாரர்களாக்குங்கள். இன்னும் சுவாரசியமான பல கட்டுரைகளுடன் மீண்டும் அடுத்த வாரம் சந்திப்போம்.